رقعة شطرنج

ع القهوة 

رقعة شطرنج

قدامها 

اتنين لعيبه

فيها الاسود

جنب الابيض

كله د قاللك

يبقى تناقض

و دي تبقى

ازدواجيه عجيبه

قبل ما تلعب

بص و فكر

ع الجنبين

صفين م القاده

قدامهم صفين 

م العسكر

بين العسكر

فضوا مساحه

لسه لحد اليوم

مش عارف

هما العسكر

بيحموا القادة

و لا العسكر بيحموا

الساحه

يمكن لو دققنا كويس

نلقى ف كل زوايا

الرقعة

لازم طابيه

و العسكري واقف

يحرسها

لكن تلقى

حصان او فيل

من قدامهم وقفوا

عساكر

لأ و ف يوم الاربع

لو فاكر

الفيل شق طريقه

بسرعه

و حصان نط

تلت نطات

عدى العسكر 

و الظباط

و العسكري

واقف محتار

لسه العسكر

بيحمي مليكه

اول ما سمع

كلمة كش

و مفيش حل

الا التبييت

ينقل ملكه

مكان الطابيه

غير شكل

اللعبه .. و لكن

لسه الدور

فيه ملك

و مماتش

العسكري

يتحرك خطوة

خطوة يمين

او خطوة شمال

ممكن يطلع

بس بيرجع

ممكن اوي 

في بداية لعبه

بيعدي مربع

و مربع

العسكري ممكن

يترقى

العسكري ممكن .. يترقى

طابية و فيل

و حصان و وزير

نزلوا الساحه

سفكوا - ضربوا

عاثوا - هربوا

و العسكري نام

نومة غفرا

بكل صراحه

العسكري .. واقف

يحميهم

العسكري .. بيحامي

عليهم

متباطئين أو متواطئين

ممتنعين

عن ضرب النار

و يقولوا
احنا حمينا الثوره

.. و الثوار

من ديوان همزة وصال

ضياء الدين - 2011

طلعوا القناديل

طلعوا القناديل 

و الشماسي مضلله

على عرايس راقده

فوق الرمله

و العرسان

اللي هجر الشط من بدري

و اللي قال :

بكفايه .. ده قدري

و اللي عدى المنش

يقول مضمنش .. دي هوجه

بيوصل شطنا بسلام

و تلقاه بعد ما يوصل

تملي يصارع الموجه

و اللي شاري

عارف ان المهر غالي

و كل جمعه بيشتري

كردان

و اللي مات .. غرقان

طلعوا القناديل

النهار .. صار

ليل

و بعد ما كتبت كتابها

بختها بيميل

سلام مربع

دقوا الشماسي

بالعرض و الطول

مربع

و حبسوا مين

اخدوا العريس من بيته

لمحاكمه

و عينه ما تشوف

الا عتمة الزنازين

يوم ما اعتقد ان الفرح

قرب

قالوله " مسوده " و لسه

بنجرب

اتاري الانتظار هيطول

و الفرح لسه .. بعيد

عصفور رموه ف القفص

و تهمته " التغريد "

طلعوا القناديل

و هما غضبانين

قالوا بسببكوا

السفن ف البحر

و لا بتروح ولا بتيجي

و قالوا ان العجل

واقف

عشان شايف

زحام

و ف زحمة العرسان

قنديل جبان

اشمعنى انا شايف

ان العجل ماشي

على جتتة العرسان

ان العجل دايس

ان اللي كان فارس

و يوميها قال حارس !

بتلعنه الفرسان !

طلع القناديل

من قلوبنا خلاص

بعد القناديل ما

غلطوا ف العنوان

دي عركة القناديل

مع السمك ف البحر

و لسعته ع الشط

بتموت الانسان

زحف القناديل ع الشط

وقت الجزر .. ده معلوم

اما اللي يزحف ف اتخاذ قرارات

ده مش مفهوم

و اللي بيهتف كلنا ايد واحده

تطلعلنا واحده

تحرض اخ يقتل اخوه

و الرمله غرقانه ف بركة

دم

قول للقناديل يرجعوا للبحر من تاني

لجل الفرح ما

يتم

قصيدة طلعوا القناديل

من ديوان همزة وصال - ضياء الدين

2011

سبع سنابل قمح

و اشمعنا يوم م اعشق

الاقيكي بتحبيه

او هوه بيحبك

و محيراني ليه

دا انا يوم ما اقول حبك

ملالي دنيتي

الاقيه بأعلى صوت

بيقول هشاركك فيه

لأ لسه مش فاهم

ليه الهموم لازمه

و كأنها لزمه

هيه الحياه معانده

و كل يوم من ده

ولا يوم هنتفاهم

دايما تراضيني

ولا مره ترضيني

ليه رافضه تقوليلي

انك عشقتي خلاص

هسمعها ميت مره

و اكتبها بالمره

و احفظها و انساها

و اعيش على ذكرى

بتجدد الفكره

لكن بدون تطبيق

و لجل ما تزعلي 

انا ماشي من بكره

سايئ عليكي النبي

ما تقولي زعلانه

متزوديش الهم

صار الأنين بعد الحنين 

دائي 

و ان قلت مش باقي

يبقى معنديش دم

دي نظرة عين

كانت تغمرني بالفرحه

و لما اقرا حروف اسمك

لوصف الحال

يطول شرحه

و شعرك اغزله ضفاير 

و يصبح دمي انا فاير

يوم ما تخلعي الطرحه

بتطرح قلبي انا ارضا

و ليه ارضى

و ايه ارفض

أرافض انك تحبي

ماهو جزاتي و ده ذنبي

عشان يعني محبتنيش

اقوم ازعل

مكنش عيش ده و ملح

ده اصله كان عيش حاف

سبع سنابل قمح

و العمر كله عجاف

و الدنيا بتنسي

كل اللى انا قاسيته

و سفينتي لو ترسي

ف مينا جديد

اخلع قميص الهم

القى حروف الاسم

مربوط

ف حبل الجيد

ضياء الدين - 2011

من ديوان : تكتب و لا تنطق

همزة ع السطر

راح ابتدي بكلمتين

كان نفسي اقولهوملك

من يوم ما شافت عنيا

حسنك الفتان

بس اعمل ايه و انتي

رافضه لأشعاري

و بتمسحي صورتي

و فارضه حظر كلام

الحب ما بقاش

يلزم العاشقين

لو في نهاية الحلم

الحكم بالاعدام

و كمان نقول اسفين

كتبت انا الكلمتين

ما بين اقامه و ادان

حطيت ف محفظتي العلم

و نزلت ع الميدان

نزلت ادق الجرس

لجل الجميع يصحى

الكل ايد واحده

من الضحى للعصر

يهتف يقول الكلمتين

" بنحب مصر "

و الليل يطول

يأبى ينام

الا على صوت غنانا

كانوا هناك

كانوا معانا

احمد عرابي و سعد باشا

ف الأمام

و بيهتفوا ورا الشيخ امام

يا مصر يا بنت البلد

يا حره مش بس بكلام

شعبك يثور .. جيشك وتد

فاتعلمي فن الخصام

شعبك دا كان ثاير و صامد

رغم المذاهب و العقائد

الظلم كان واحد

و الرب كان شاهد

و مينكروش اتنين

فعشان كده .. ايدي الشموع

و طفي نار قلب الجموع

دقنا المهانه والمذله

سنين

و صابرين و ناظرين

بركة نفيسه .. و الحسين

بنصر في ليبيا

و ثورة اهل اليمن

و شعب سوريا عزيز

كل العرب ثوار

حتى يعود الزمن

و ينبه الغافلين

اسرائي من سينا

معراجي ف فلسطين

و صلاتنا ف الميادين خشوع

لو كانت القبله بمكه

و مكه شيماء الربوع

او كانت القدس العتيقه

راجعين لوطنك يا يسوع

يا مصر يا عشقي و داري

و نبضي لما .. لون خدودك

دم قلبي .. لو تداري

و حبي ليكي بين حواجز صمت

بيحاول يعدي

لجل ما يصبح نهاري

حبي الحبيب اللي افتداكي

بعمره .. و اللي بات ضرير

حبي اللي شاري دبلتك

و رايد جنتك

و مات يوم فرحه ف التحرير

مش طامع ف نيلك

و لا ف دهبك

و لا ف اهرام

اليوم دا يومك

لجل تحققي الاحلام

فاختاري حكامك

و كسري الاصنام

دي الكعبه ميدانك

و توبك الاحرام

همزة ع السطر - ديوان " همزة وصال "

ضياء الدين - 2011

في جملة مفيدة

فسبحان من جمع بينا
من غير معاد سابق
انا اللي قلبي ف حبي ليكي
كان سابق
و ازاي راح يبقى حبي ليكي
مش صادق
دا انا بعمل اللي بعمله
و بعيد كلام من أوله
ازاي أنا أعمل كده
لو كان لقلبك .. قلبي مش عاشق
وليه رفضتي تصدقي اني
بحبك حب فوق الوصف

و فوق حروف ” العله ” و ” التسويف ” و
واو ” العطف ” و
شوقي ليكي صعب أني اتحمله
من غير ما أبوح أو أقول
من الأربع حروف دول
حرف
..
أنا اللي داخل دينك انتي
و دنيتك
من غير ما اشوف تعذيب
و لا ترهيب
و لقيتني من غير ما أدري
باللي بعمله
أنا كل حول
بصلي الفجر في
سيدنا الحسين
و بعدها
أأقيد الشمع للعدرا البتول
مكتوب على خانة الديانه
في بطاقتي اسمك
و حبك انتي كان نبي .. و رسول

بيبشر القلب الحزين بالمغفره
و بيمحي ذنبي اللي بقاله
سنين
عايش .. بدون حبك
سنين فاتت
و كأن روح العاشقين
ماتت
لا بيحسدوني على
صوم .. ولا حتى .. صلاه
و لا يعرفولي دين

مش قلتلك حبك هداني للاله
مش قادر اقول اكتر من المعنى
ياما نفسي اكون موسى
لما الهه ناجاه
و نور ربي …. على دربي
اسيــــر وياه
و ادي حق ربي عليا ع المدنه

طب لما اولع شمعتين ليها
و القبلتين .. قدامي ف عنيها
و الطرحه … طارحه سلام
اناجيها
و الحب .. لو للرب
عشق الروح

طب ده تسميه ايه
غير انه … بـــــوح

في جمله مفيده - ديوان تكتب ولا تنطق

ضياء الدين  - 2011

و امتى تعرفي .. ؟

و بقولك انتي اللي نده
قلبي عليكي سنين
و مشفنكيش .. معرفتكيش
الا بقالي يومين
فيهم لقيت قلبي أنا
شاغل ساعات الليل غنا
و ساعات بنام
بحلم باسمك بعد كلمه
نفسي اقولها
بس مش عارف .. و مش قادر
و لحد امتى انا هبقى
مش قوي ع الكلام

ده انتي اللي جيتي و نستينى
الألم
و فرشتي دنيتي بالورود
و بعت قلبي لدنيتك
وحدك يا قلبي لا تعود
ده انا نفسي اعرف
انتي بتحسي بمشاعري ..
أو شعوري
أو حتى لاحظتي عنيا بقولها
يا عنيا غيرى
و ان قلت يوم هرسمك
بحتار و مش عارف
منين ابدأ
و ايه ارسم
و الاقيني بعد ساعات كتير
على لوحة الرسم اللي قدامي
كتبت
” الدنيا لسه بخير “
كل الجمال و الحسن فى ملامحك
دول رفضوا يترسموا
يمكن عشان جواكى أحلى
و لا انتى رافضه اربطك في خيالي
باللوحه و الألوان
انتى الحقيقة الوحيده
اللي مش مره
و مش عارف
لأمتى راح تضل ابعد
و أمتى تبان

قصيدة ( و امتى تعرفي ؟! ) - ضياء الدين 
آخر قصيدة ليا في 2010

ما عدش عندي كلام

و لأيه رجعتي تقولي
راجع قوام نفسك
ده انتي اللي كان فيكي
كل اللي برتاحله
و ان يوم لقيت في عنيكي
نظرة فرح و سرور
و الفرح مالي القلب
من قلبي بفرحله
و ان يوم يصيبه الهم
يبقى معنديش دم
لو اني افكر انام
من غير سؤال و جواب

و لقلبي يشرحله
و ان جيت في يوم ارتاح
من عتمة الاحلام
و تعبي طول الليل
انتي و بس براح
و عطرك الفواح
يمحي ألم ايام
و يشفي قلب عليل
طب ليه زمان قالوا
الفرحه ما بتكملش
و مفيش قصيدة حب
تنفع لنفس القلب
من غير ما ينضاف بيت
في يوم من الأيام
يغير المضمون
و يمحي معنى كلام
قلبي ما قالش جواب
و عنيكي منعاني
من نظرتين و عتاب
و الدمعه حزناني
من امتى بتخبي
و تسافري طول الليل
و تسيري على دربي
و بتعملي ناسياني
و لأيه تعاندي الهوى
أو حتى تفرضي فرض
ده الفرح طار في الهوا
و نزل لسابع أرض
بيحوم عليه غربان
هيعيش سنين غرقان
في بحر من نسيان
أو متر طول في عرض

وسط القلوب مجروح
و الجرح بات مفتوح
بين القلوب حكايات
و فرح بيمحي آهات
الكل هنا نزلاء
على سفينة نوح

ضياء الدين - 2010

و ليه ترضي .. ؟

و ان جيتلك في يوم
اشرح
سنين فاتت 
و لم افرح
و عدت بيا ايامها
بمركب نيل
و ليلي طويل
و عيني مغمضتش 
سنين
و طعم النوم 
بيهجر .. كل أركانها

و ان جيتلك في يوم
مظلوم
و ضهري معدش حمل هموم
و انا ما اتقنش فن العوم
و انت جزيرتي .. و نجاتي
في بحر وسيع

و موج .. عاتي

و قلتي
و قلت مش غلطان
و قلتي معدش ليا أمان
و جذع الشجره مش قشه
ما راحش ينجي الغرقان

عرفتي قد ايه قاسيه
على اللي قلبه بيحبك
في لحظه عرفتي
وش نحيل
و ساعه بتعملي .. ناسيه

قوام راح تنسي حكايتنا
و تتجاهلي و تعترضي
مادام مش قادره تنسيني
لأيه ترضي ؟
و امتى تبطلي تبصيلي في عيوني
و تنسي ان انا عرفتك
عشان ارتاح
و كله سواء
بقلب سليم .. بقلب جريح
هسيب نفسي مابين الموج
و وسط الريح